सोलापूर : रोटरी जिल्हा ३१३१ व ३१३१ यांच्या संयुक्त विद्यमाने काश्मीरमधील अनंतनाग, पुलवामा , शोंपिया व कुळगाम या चार जिल्ह्यांमध्ये नुकतेच मोफत शस्त्रक्रिया शिबिर पार पडले. ४ ते १३ सप्टेंबर या कालावधीत झालेल्या या शिबिरात १२३५ शस्त्रक्रिया मोफत झाल्याचे शिबिराचे आयोजक रोटरीचे माजी प्रांतपाल डॉक्टर राजीव प्रधान यांनी सांगितले.
शिबिरात स्त्रियांचे आजार, अस्थिरोग, कान – नाक – घसा, डोळे, कर्करोग, प्लास्टिक सर्जरी आणि लहान मुलांच्या शस्त्रक्रिया तसेच इतर जनरल शस्त्रक्रियांचा समावेश होता. यापैकी अनेक शस्त्रक्रिया अत्यंत गुंतागुंतीच्या होत्या . शिबिरामध्ये महाराष्ट्रातून व इतर राज्यांमधून 30 सर्जन आणि तीन स्वयंसेवक सहभागी झाले होते.
सोलापूर जिल्ह्यातून संजय मंठाळे, शशिकांत गंजाळे, असीत चिडगुपकर, मीनल चिडगुपकर, आनंद खडके , मनोज भायगुडे हे डॉक्टर आणि धनश्री केळकर सहभागी झाले होते. डॉक्टर मंठाळे यांनी कानाच्या व घशाच्या अवघड शस्त्रक्रिया पार पाडल्या . डॉक्टर गंजाळे व डॉक्टर असित चिडगुपकर यांनी पाठीच्या मणक्याच्या शस्त्रक्रिया केल्या. अस्वलाच्या हल्ल्यात एक हात निकामी झालेल्या रुग्णावर डॉक्टर चिडगुपकर यांनी अत्यंत गुंतागुंतीची शस्त्रक्रिया केली.
कातडीपासून हाडापर्यंत जखमी झालेला हात पूर्ववत करण्यात यश मिळाले. डॉक्टर खडके व भायगुडे या दोघांनी डोळ्याच्या अनेक शस्त्रक्रिया शोंपीया व पुलवामा येथे केल्या. एका लहान मुलीवर तिरळेपणा दूर करण्यासाठीची शस्त्रक्रिया डॉक्टर भायगुडे यांनी केली. डॉक्टर मीनल चिडगुपकर यांनी शिबिरातील काही दिवस अनंतनाग ते पुलवामा असा ऐंशी मिनिटे प्रवास करून स्त्रियांच्या आजारावरील शस्त्रक्रिया पार पाडल्या. डॉक्टर धनश्री केळकर यांनी अनंतनाग येथील रोटरीच्या ‘टीम’ चे समन्वयक म्हणून काम केले.
जम्मू काश्मीरचे राज्यपाल लेफ्टनंट गव्हर्नर मनोज सिन्हा यांनी रोटरीचे या शिबिराबद्दल कौतुक तर केलेच परंतु पुंछ व राजौरी या जिल्ह्यामध्ये असेच शिबिर भविष्यात घेण्याची विनंती केली. काश्मीरचा हा भाग अतिशय संवेदनशील समजला जातो . अनंतनाग येथे रोटरीची टीम कार्यरत असताना शेवटच्या दिवशी लष्करी तुकडीवर झालेल्या दहशतवादी हल्ल्यात तीन मोठे अधिकारी शहीद झाले. पुलवामा आणि शोपिंया ही गावे आणि इतर गावांना जोडलेले रस्ते रात्री पूर्णपणे लष्कराच्या ताब्यात असतात . अशा प्रतिकूल परिस्थितीत महाराष्ट्रातील वैद्यकीय तज्ञांनी त्यांची सेवा देण्यासाठी धाडस दाखवले.
काश्मीर सरकारने या शिबिरासाठी महत्त्वाचे कार्य केले. काश्मीरच्या आरोग्य विभागाने घरोघरी जाऊन दोन महिने रुग्णांची निवड केली. शस्त्रक्रियांसाठी लागणारी औषधे, साधनसामग्री राज्य सरकारने उपलब्ध करून दिली. त्याचप्रमाणे काही उपकरणे, तसेच ऑपरेटिंग मायक्रोस्कोप सरकारने इतर जिल्ह्यातून शिबिरासाठी मागविले होते. जवळपास १०० रुग्णसेवक या शिबिरासाठी दिवस- रात्र काम करीत होते. या सर्व रोटरी टीम आणि राज्य सरकारी कर्मचाऱ्यांच्या परिश्रमातून या शिबिरात १२३५ शस्त्रक्रिया यशस्वीपणे पार पडल्या. काश्मीरमधील सर्व-सामान्य जनतेला मुख्य प्रवाहात आणण्याच्या दृष्टीने हे एक छोटेसे परंतु महत्त्वाचे पाऊल पडले, असेच म्हणावे लागेल. रोटरीची अशाप्रकारे देश-विदेशात २८ शिबिरे पार पाडणाऱ्या माजी प्रांतपाल डॉक्टर राजीव प्रधान यांच्या कुशल नेतृत्वामुळे हे यश मिळाले.
