अत्यंत वेगळ्या धाटणीचा नवा विषय घेऊन मंगलमय वातावरणात ‘अल्ट्रा मीडिया अँड एंटरटेनमेंट’ निर्मित “ढ लेकाचा” हा नवा चित्रपट २६ जूनला ‘अल्ट्रा झकास’ या नव्या मराठमोळ्या ओटीटीवर प्रदर्शित होणार आहे. सध्या वारकरी संप्रदायासोबत अनेक कलाकार विठुरायाच्या अखंड भक्तीत तल्लीन झाल्याचं चित्र असतांनाच “ढ लेकाचा” हा नवा मराठी चित्रपट महाराष्ट्रातील तमाम प्रेक्षकांसाठी एक पर्वणी ठरणार असल्याचे या चित्रपटातील कलावंतांनी सांगितले. या चित्रपटाच्या प्रदर्शनाविषयी माहिती देण्याबाबत तसेच ‘पोस्टर लॉन्च’ कार्यक्रमानिमित्त आज खास सोलापूर येथे पत्रकार परिषदेचे आयोजन करण्यात आले होते. विठ्ठलाप्रमाणेच सर्वांच्या मदतीला धावून जाणाऱ्या भाल्याचा खडतर प्रवास “ढ लेकाचा” या चित्रपटातून मांडण्यात आला असून, या सिनेमाचं ‘पोस्टर’ पंढरपुरातील प्रसिद्ध विठ्ठल-रखुमाईच्या साक्षीने आज मंदिरात प्रदर्शित केले जाणार असल्याचे सांगण्यात आले.
विठ्ठल रखुमाई सोबतच संपूर्ण महाराष्ट्रातील तमाम रसिक प्रेक्षकांनाही भुरळ घालणारं “ढ लेकाचा” या चित्रपटातील हे अत्यंत निरागस भाव असलेलं लोभस पोस्टर पाहताच चित्रपटाच्या कथाबीजाची कल्पना येते. पोस्टरवरील नवोदित बाल कलाकार आयुष उलागड्डेच्या चेहर्यावरील विलक्षण भावमुद्राभिनय पाहून “ढ लेकाचा” चित्रपटाबद्दल प्रेक्षकांच्या मनात कमालीचे कुतूहल निर्माण होते. आषाडीच्या अगदी दोन दिवस अगोदर ‘ढ लेकाचा’ हा चित्रपट अल्ट्रा झकास या ओटीटीवर प्रदर्शित होणार असल्याने प्रेक्षकांसाठी आपल्या प्रिय विठू-रखुमाईचा प्रसादच आहे असं म्हटल्यास वावगं ठरू नये.
दिग्दर्शक जोगेश्वर ढोबळे दिग्दर्शित ‘ढ लेकाचा’ या चित्रपटाची कथा भाल्या या तरुण मुलाभोवती फिरते, भाल्याच्या शाळेत शिकत असणा-या विक्की देशमुख या विद्यार्थ्याला असलेल्या पैशाच्या माजामुळे गुंडगिरीचा सामना करत तसेच शाळेतील शिक्षणप्रणालीच्या अडचणींना तोंड देत शालेय जीवनात संघर्ष करावा लागतो. भाल्याचं त्याचे वडील आणि पाळीव बकरी बादशाहसोबत एक भावनिक नातं तयार होताना दिसत आहे. आपल्या मुलाच्या मूलभूत गरजा पुरवण्यासाठी अथक परिश्रम करत असताना भाल्या आणि त्याचे वडील सदा लोहार यांच्यातील नात्याचे सुंदर चित्रिकरण या चित्रपटात करण्यात आले आहे. या चित्रपटात बाल कलाकार आयुष उलागड्डे सोबतच अतुल महेल, मुकुंद वसुले यांच्याही प्रमुख भूमिका आहेत.
“ढ लेकाचा” चित्रपटाद्वारे प्रेक्षकांना एक वेगळीच पर्वनी यातून पाहायला मिळणार आहे. नुकत्याच संपन्न झालेल्या ‘अंबरनाथ फिल्म फेस्टिवल’ने या चित्रपटामधील बालकलाकार आयुष उलागड्डेच्या उत्तम अभिनय कामगिरीची ओळख प्रेक्षकांना पुरस्कारामार्फत करून दिली आहे. दर्जेदार आणि उत्तम कथा यासारख्या वेगवेगळ्या पठडीतले आशयघन चित्रपट प्रेक्षकांच्या भेटीला आणत ‘अल्ट्रा मीडिया अँड एंटरटेनमेंट’मार्फत “ढ लेकाचा” सारख्या दर्जेदार मराठी चित्रपटाची जादू प्रेक्षकांना २६ जून पासून आपल्या आवडत्या ‘अल्ट्रा झकास’ओटीटीवर अनुभवता येतील.
