सोमवारपासून सोलापूर विद्यापीठाच्या परीक्षा नियोजित वेळापत्रकानुसार सुरू होणार

परीक्षा संचालक डॉ. गणपुर यांची माहिती

• सोलापूर- राज्य शासनाच्या उच्च व तंत्र शिक्षण विभागाचे प्रधान सचिव विकास चंद्र रस्तोगी यांच्या आदेशानुसार पुण्यश्लोक अहिल्यादेवी होळकर सोलापूर विद्यापीठाच्या परीक्षा सोमवार, दि. 6 फेब्रुवारी 2023 पासून नियोजित जाहीर अंतिम वेळापत्रकानुसार सुरू होणार असल्याची माहिती परीक्षा व मूल्यमापन मंडळाचे संचालक डॉ. शिवकुमार गणपुर यांनी दिली.

• पुण्यश्लोक अहिल्यादेवी होळकर सोलापूर विद्यापीठाच्या माहे ऑक्टोबर/नोव्हेंबर-2022 च्या विद्यापीठ आयोजित परीक्षा दि. 23 जानेवारी 2023 पासून सुरू झाले होते, मात्र महाविद्यालयीन व विद्यापीठ कर्मचाऱ्यांचा परीक्षा कामकाजावर बहिष्कार आंदोलनामुळे दि. 2 ते 4 फेब्रुवारी 2023 दरम्यानच्या परीक्षा स्थगित करण्यात आल्या होत्या. आता शासनाच्या आदेशानुसार दि. 6 फेब्रुवारी 2023 पासून विद्यापीठाच्या संकेतस्थळावर जाहीर अंतिम वेळापत्रकानुसार ज्या-त्या दिवसाची परीक्षा सुरू करण्यात येत असल्याचे परिपत्रक परीक्षा व मूल्यमापन मंडळाचे संचालक डॉ. गणपुर यांनी काढले आहे. याची माहिती संबंधित सर्व महाविद्यालये, संस्था चालक व अधिविभाग प्रमुखांना कळविले आहे.

• दि. 6 फेब्रुवारी 2023 पासून नियमितरित्या वेळापत्रकानुसार होणाऱ्या परीक्षेसाठी संबंधित सर्व महाविद्यालये, विद्यापीठ संकुले व परीक्षा केंद्रप्रमुख आणि कर्मचाऱ्यांनी आवश्यक उपाययोजना करून परीक्षा विहित वेळेत पार पडतील, याची दक्षता घ्यावी, अशी सूचना देखील परीक्षा संचालक डॉ. गणपूर यांनी केली आहे. विद्यार्थ्यांनी आपल्या वेळापत्रकानुसार परीक्षा द्यावी, असे आवाहन देखील त्यांनी केले आहे.

• 2 ते 4 फेब्रुवारी दरम्यानच्या परीक्षा नंतर होणार
  महाविद्यालयीन व विद्यापीठ कर्मचाऱ्यांच्या बहिष्कार आंदोलनामुळे दि. 2 ते 4 फेब्रुवारी 2023 दरम्यानच्या परीक्षा स्थगित करण्यात आल्याने आता त्या परीक्षा नंतर होणार आहेत. त्यासंदर्भात विद्यापीठ संकेतस्थळावर सुधारित वेळापत्रक जाहीर करण्यात येईल व त्याची माहिती विद्यार्थ्यांना देण्यात येईल, अशी माहिती परीक्षा व मूल्यमापन मंडळाचे संचालक डॉ. शिवकुमार गणपुर यांनी दिली.