मुंबई : शिवसेनेला लागलेल्या बंडखोरीचं ग्रहण कमी होताना दिसत नाहीय. एकनाथ शिंदे यांनी शिवसेनेत फूट पाडल्यानंतर अनेकांनी शिंदे गटात प्रवेश केला. त्यामुळे उद्धव ठाकरे गटाला मोठे खिंडार पडले. आता शिवसेनेतील आणखी एक माजी आमदार शिंदे गटात सामील झाला आहे. माजी आमदार कृष्णा हेगडे यांनी शिंदे गटात प्रवेश केला असून त्यांच्यासोबत असंख्य समर्थकांनीही शिंदे गटाला जवळ केले आहे.
माजी आमदार कृष्णा हेगडे यांनी काल आपल्या कार्यकर्त्यांसह मुख्यमंत्री एकनाथ शिंदे यांच्या उपस्थितीत शिंदे गटाला समर्थन दिले. शिंदे गटात प्रवेश करताच त्यांना शिंदे गटात उपनेतेपद आणि प्रवक्तेपदाची जबाबदारी सोपवण्यात आली आहे.मुंबईतील विलेपार्ले भागात कृष्णा हेगडे यांचा बालेकिल्ला आहे. काँग्रेस, भाजपा, शिवेसना अशा पक्षात काम करून ते आता शिंदे गटात सामील झाले आहेत.
