तेलंगणा : तेलंगणाचे मुख्यमंत्री के. चंद्रशेखर राव यांनी पंतप्रधान नरेंद्र मोदी यांच्यावर जोरदार निशाणा लगावला आहे. मोदी सरकार राज्याच्या विकासासाठी पाठिंबा देत नाही. त्यामुळे त्यांना सत्तेतून खाली खेचणार असल्याचे चंद्रशेखर राव म्हणाले. तसेच गरज पडल्यास राष्ट्रीय राजकारणात भूमिका बजावण्यास तयार असल्याचे ते म्हणाले. तुम्ही आम्हाला राष्ट्रीय प्रकल्प देऊ नका, तुम्ही आम्हाला वैद्यकीय महाविद्यालय देऊ नका, तुम्ही आम्हाला पाठिंबा दिला नाही तरी काही हरकत नाही. आम्ही तुम्हाला सत्तेपासून दूर करु आणि आम्हाला मदत करणारे सरकार सत्तेत आणू, असेही चंद्रशेखर राव म्हणाले.
जानगाव जिल्ह्यातील यशवंतपूर येथे जाहीर सभेत बोलताना केसीआर यांनी मोदी सरकारवर निशाणा लगावला. गरज भासल्यास दिल्लीचा किल्ला तख्त सर करण्यासाठी राष्ट्रीय राजकारणात भूमिका बजावण्यास तयार असल्याचे त्यांनी सांगितले. तेलंगणात एनडीए सरकारने प्रस्तावित केलेल्या वीज सुधारणांची अंमलबजावणी राज्य सरकार करणार नसल्याचेही देखील राव यांनी स्पष्ट केले. जर लोकांनी मला आशीर्वाद दिलात तर मी दिल्लीत जायला तयार असल्याचे राव म्हणाले. नरेंद्र मोदी सावध राहा असेही त्यांनी सांगितले.
