जमाबंदी आयुक्त निरंजन सुधांशू यांनी घेतला सातबारा संगणकीकरणाचा आढावा
सोलापूर: जिल्ह्यात सिटी सर्व्हे झालेल्या बिगरशेती जागा मोठ्या प्रमाणात आहेत. मात्र यांची सातबारा असल्याने प्रापर्टी कार्ड तयार नसतात. सध्या सर्व बिगरशेती असलेल्या जागांचे सातबारा बंद करून प्रापर्टी कार्ड बनविण्याचे काम सुरू आहे. मात्र नागरिकांची गैरसोय टाळण्यासाठी काही कालावधीसाठी बिगरशेती असलेल्या जागांचे सातबारा उतारे पोर्टलवर ठेवण्याच्या सूचना जमाबंदी आयुक्त निरंजन सुधांशू यांनी केल्या.
जमाबंदी आयुक्त सुधांशू हे सोलापूर दौऱ्यावर असून त्यांनी आज जिल्हाधिकारी कार्यालयात सातबारा संगणकीकरण, प्रापर्टी कार्ड याबाबत आढावा घेतला. यावेळी जिल्हाधिकारी मिलिंद शंभरकर, भूमी अभिलेखचे उपसंचालक किरण तवरेज, सहायक जिल्हाधिकारी मनीषा आव्हाळे, निवासी उपजिल्हाधिकारी शमा पवार, भूमी अभिलेखचे जिल्हा अधीक्षक हेमंत सानप यांच्यासह उपअधीक्षक ऑनलाईनद्वारे सर्व प्रांताधिकारी, तहसीलदार उपस्थित होते.
सुधांशू यांनी जिल्ह्यातील ई-फेरफार नोंदीची माहिती घेतली. एमआयएस पोर्टलवर येणाऱ्या अडचणी जाणून घेवून निराकरण केले. सातबाऱ्यावरील माहिती योग्य पद्धतीने अभ्यासून पोर्टलवर भरावी. महाभूमी पोर्टलवरील माहिती वेळेत भरून अपडेट करा. सिटी सर्व्हे झालेल्या भागातील सातबारा बंद करून प्रापर्टी कार्ड चालू करण्याबाबतही त्यांनी सूचना दिल्या.
गावांचा औद्योगिक विकास, गावाची नागरीकरणाची वाढ इत्यादी बाबी तसेच इमारतीसाठी ज्या जमिनी लागण्याची शक्यता आहे याचा विचार करुन महाराष्ट्र जमीन महसूल अधिनियम 1966 कलम 122 च्या तरतुदीनुसार नगर भूमापनाची हद्द ठरविण्यात येणार आहे. प्रायोगिक तत्वावर राज्यात मिरज, नाशिक, पुणे आणि वर्धा या चारठिकाणी चाचणी सुरू असल्याची माहिती सुधांशू यांनी दिली.
इ-पीक पाहणीसाठी नवीन ॲप येणार
राज्यात इ-पीक पाहणी सुरू आहे. मात्र पूर्वीच्या ॲपमध्ये काही त्रुटी असल्याने नवीन ॲप बनविण्यात येत आहे. यामध्ये प्रत्येक शेतकरी ॲपमध्ये आपल्या पिकाची स्वत: माहिती भरतील. त्यांना भरलेली माहिती पुन्हा दिसणार आहे. जिओ टॅगिंग असल्याने शेताजवळ असेल फोटो काढून अपलोड करण्याची सोय करण्यात आली असल्याची माहितीही सुधांशू यांनी दिली.
