येस न्युज मराठी नेटवर्क : देशासह राज्यात कोरोनाची तिसरी लाट सुरू असून मोठ्या प्रमाणात रुग्ण आढळत आहेत. राज्यात शनिवारी २७ हजार रुग्ण आढळले आहेत. ओमायक्रॉनचा प्रसार सुरू असतानाच कोरोनाच्या न्यूकॉन व्हेरियंटची भीती वर्तवण्यात येत आहे. यावर राज्याचे आरोग्यमंत्री राजेश टोपे यांनी भाष्य केलंय. तसेच करोनाची ही लाट कधीपर्यंत संपुष्टात येईल, याबद्दलही त्यांनी पंढरपुरात माहिती दिली.
कोरोनाची तिसरी लाट ही मार्च महिन्याच्या मध्यापर्यंत संपुष्टात येईल, अशी माहिती तज्ज्ञांनी दिल्याचं टोपे म्हणाले. कोरोनाचा न्यूकॉन हा व्हेरिंयट घातक असून त्यासंदर्भात वर्तवण्यात येणाऱ्या भीतीबद्दल बोलताना टोपे म्हणाले, की प्राथमिक माहितीनुसार हा व्हेरियंट धोकायदायक आणि घातक असल्याचं म्हटलं जातंय. परंतु राज्यातील आरोग्य यंत्रणा या विषाणुचा सामना करण्यासाठी सक्षम आहे. तसेच जागतिक आरोग्य संघटना त्यावर संशोधन करत आहे. विशेष म्हणजे त्यात मृत्यूदर ३० टक्के आहे असं सांगितलं गेलं आहे. तो ओमायक्रॉनइतकाच वेगाने प्रसार होणारा आहे. पण अद्याप यावर जागतिक आरोग्य संघटना अभ्यास करत आहे. त्याचे कोणतेही बाधित नव्याने कुठे आढळलेले नाहीत. त्यामुळे अद्याप त्यावर काळजी करण्याची आवश्यकता नाही”, असंही टोपे यांनी सांगितलं.
