मंगळवेढा : मयत आजीच्या तिसऱ्या दिवशी अस्थि विसर्जनासाठी बेगमपूर येथे जात असताना मंगळवेढा – सोलापूर रोडवर टेम्पोशी झालेल्या धडकेत दोघा दुचाकीस्वारांचा जागीच मृत्यू झाला. आजीच्या अस्थि विसर्जनापूर्वीच अविवाहित तरुण नातवाचा अपघाती मृत्यू झाल्याने मंगळवेढा तालुक्यातील नंदेश्वर गावावर शोककळा पसरली आहे.
याबाबत मिळालेली माहिती अशी, की अरविंद ज्ञानेश्वर मेटकरी (वय 21) याच्या आजी भामाबाई दाजी मेटकरी (वय 66) हिचे दोन दिवसांपूर्वी निधन झाले होते. आज (शनिवारी) आजीच्या तिसऱ्या दिवसाचा विधी पूर्ण झाल्यानंतर बेगमपूर येथील भीमा नदी पात्रात अस्थि विसर्जनासाठी बंडू पांडुरंग गोरे (वय 42) व अरविंद ज्ञानेश्वर मेटकरी (वय 21) हे दोघे दुचाकीवरून जात होते. मात्र सकाळी 9.45 च्या दरम्यान दुचाकी व टेंपो यांच्यात अपघात झाला. या अपघातात बंडू पांडुरंग गोरे व अरविंद ज्ञानेश्वर मेटकरी या दोघांचा मृत्यू झाला. अपघातानंतर पोलिस घटनास्थळी दाखल झाले. या अपघाताबाबत मंगळवेढा पोलिस ठाण्यात गुन्हा दाखल करण्याचे काम सुरू आहे.मृत अरविंद मेटकरी हा अविवाहित असून संगणक क्षेत्रात तज्ज्ञ होता. तर बंडू गोरे हा शेती करत होता. आजीच्या मृत्यूने दु:खात असणाऱ्या मेटकरी कुटुंबीयांना तरुण नातवाचाही अपघाती मृत्यू झाल्याने मोठा धक्का बसला आहे. या घटनेनंतर नंदेश्वर गावावर शोककळा पसरली असून, सर्वत्र हळहळ व्यक्त करण्यात येत आहे.
