सोलापूर : लहान मुलीने गच्चीवर खडे टाकल्याच्या कारणावरून मोठ्या व्यक्तींमध्ये शिवीगाळ आणि लाथाबुक्क्यांनी मारहाण तसेच मोटारसायकलवर लाकडाने मारून नुकसान करण्याचा प्रकार घडला आहे. जुळे सोलापूर येथील श्रीनगर भाग एक येथे हा प्रकार ११ जून रोजी दुपारी तीन वाजण्याच्या सुमारास झाला . सिद्धाराम कोळी यांनी या मारहाणीबाबत रुक्मिणी वाघमारे , लक्ष्मण लामतुरे , तसेच इतर अनोळखी दोन पुरुष व दोन महिलांविरुद्ध तक्रार दाखल केली आहे. कोळी हे घरात झोपले असताना वरील आरोपींनी मिळून कोळी यांच्या घरात येऊन मोठ्याने शिवीगाळ दमदाटी करून कोळी यांची पत्नी , बहीण व आईला लाथाबुक्क्यांनी मारहाण केली. पोलिसांकडे फिर्याद देण्यासाठी जात असताना पुन्हा एकदा सिद्धाराम कोळी यांच्या मोटारसायकल समोर येऊन लाकडाने मोटारसायकलवर मारून पाठीमागील मडगार्ड तोडण्यात आल्याचेही फिर्यादीत म्हटले आहे . विजापूर नाका पोलीस ठाण्याचे पोलीस नाईक शेळके अधिक तपास करीत आहेत.
बाळे आरोग्य केंद्रात रजिस्टर फेकून डॉक्टरांना दमदाटी
सोलापूर : बाळे नागरी आरोग्य केंद्रात covid-19 च्या अनुषंगाने काम चालू असताना आनंद भवर, अलका भवर व इतर चार जणांनी मिळून शिवीगाळ केली. हा प्रकार 12 जून रोजी सकाळी साडेदहा वाजण्याच्या सुमारास घडल्याचे फिर्यादीत म्हटले आहे. डॉक्टर प्रियंका शेटे यांच्या ताब्यातील रजिस्टर हिसकावून घेऊन फेकून दिले. तुम्हाला या केंद्रात येऊ देणार नाही, अशी धमकीची भाषा वापरल्याने फिर्याद फौजदार चावडी पोलिस ठाण्यात करण्यात आली आहे. डॉक्टर प्रियंका शेटे यांनी याबाबत तक्रार दाखल केली आहे. कायझन होंडा शोरूम येथील कर्मचारी अभिजीत जाधव हा कोरोना पॉझिटिव्ह असल्याचे कारणावरून हा गोंधळ झाल्याचे सांगण्यात आले. फौजदार चावडी पोलीस ठाण्याचे सहाय्यक पोलीस निरीक्षक बर्डे अधिक तपास करीत आहेत.
