येस न्युज मराठी नेटवर्क : ‘ऑक्सफर्ड’च्या भाषा विभागाने ‘आत्मनिर्भर’ या शब्दाला २०२०चा हिंदी भाषेच्या विशेष शब्दाचा मान दिला आहे. भाषातज्ज्ञ कृतिका अग्रवाल, पूनम निगम सहाय आणि इमोगन फॉक्सेल यांच्या समितीने या शब्दाची निवड केली.वर्षभरात लोकांच्या भावना, मानसिकता प्रतिबंबित करणाऱ्या, सांस्कृतिक महत्त्व सांगणाऱ्या शब्दाची आणि दीर्घकाळ टिकणाऱ्या शब्दाची ‘ऑक्सफर्ड हिंदी शब्द’ म्हणून निवड केली जाते. पंतप्रधान नरेंद्र मोदी यांनी कोविड-१९ च्या संकटातून देशाला बाहेर काढण्यासाठी पॅकेजची घोषणा करताना अर्थव्यवस्था, समाज आणि वैयक्तिक पातळीवर आत्मनिर्भर होण्याच्या मुद्द्यावर जोर दिला होता.
त्यानंतरच देशभरात सार्वजनिक पातळीवर ‘आत्मनिर्भर भारत’ या शब्दाचा वापर वाढल्याचे निरीक्षण नोंदवण्यात आले. प्रजासत्ताक दिनाच्या संचलनामध्ये बायोटेक्नॉलॉजी विभागाचा ‘आत्मनिर्भर भारत मोहिमे’चे महत्त्व सांगणारा आणि लसीकरणाची माहिती देणारा रथही राजपथावर होता.
‘आत्मनिर्भर’ शब्दाला ऑक्सफर्डचा मान
