19 ऑगस्ट हा दिवस जागतिक मानवतावादी दिवस म्हणून मानला जातो. जगभरातील मानवतावाद्यांचा सन्मान करण्यासाठी हा दिवस साजरा केला जातो. मानवता हे आपलं मूलभूत कर्तव्य आहे. याच मूल्याचा आणि हे मूल्य खऱ्या अर्थाने अंगीकारणाऱ्या प्रत्येकाचा सन्मान करण्यासाठी दरवर्षी १९ ऑगस्ट हा जागतिक मानवतावादी दिवस म्हणून साजरा केला जातो. गरजू आणि असहाय्य लोकांच्या सेवेसाठी मनोभावे, अखंड आणि अविरतपणे तत्पर असणाऱ्या मानवतावादी लोकांच्या सन्मानार्थ हा दिवस साजरा केला जातो. गरजू लोकांना योग्यवेळी योग्य ते सहाय्य मिळालं पाहिजे हा या दिवसाचा खरा संदेश आहे.इराकमधील बगदाद येथील कॅनाल हॉटेलवर 2003 च्या बॉम्ब हल्ला करण्यात आला होता. ज्यात इराकमधील मुख्य मानवतावादी सर्जियो व्हेइरा डी मेलो यांच्यासह 22 लोकांचा बळी गेला होता. तेव्हापासून हा दिवस जागतिक मानवता दिवस म्हणून साजरा करण्याचा निर्णय घेण्यात आला. बगदाद दुर्घटनेनंतर 4 हजारांहून अधिक मदत कार्यकर्त्यांना लक्ष्य करण्यात आलं होतं. अनेकांचा मृत्यू झाला, अनेक जण जखमी झाले, तर अनेकांना अटक करण्यात आली होती. या सगळ्यांच्या बलिदान प्रित्यर्थ हा दिवस साजरा केला जातो.
वर्ष 2021 साठी जागतिक मानवतावादी दिवस हा हवामान संकट आणि त्याचा तात्काळ मानवी जीवनावर होणाऱ्या परिणामांवर प्रकाश टाकणारा आहे. जागतिक नेत्यांना हवामान बदलाला आव्हान देण्यासाठी आणि जगातील सर्वात असुरक्षित लोकांना वाचवण्यासाठी अर्थपूर्ण पावले उचलण्यासाठी दबाव आणणं हा यामागचा हेतू आहे.“हवामान बदलाचा वेग कमी करण्यासाठी आणि पृथ्वी ग्रहाचं भविष्य सुरक्षित करण्यावर केंद्रित बहुतांश हवामान मोहिमांसह, जागतिक मानवतावादी दिवस 2021 हा हवामान संकटाचा तात्काळ मानवी खर्च हायलाइट करेल आणि जागतिक नेत्यांवर अर्थपूर्ण हवामान कारवाई करण्यासाठी दबाव आणेल” जागतिक संस्थेनेकडून ही थीम आपल्या वेबसाईटवर प्रकाशित करण्यात आली आहे.
संयुक्त राष्ट्र महासभेने 19 ऑगस्ट 2009 मध्ये जागतिक मानवतावादी दिनाची औपचारिक घोषणा केली.
प्रत्येकाला मानवतावादी मूल्यांची आठवण करून देण्यासह जगभर मानवतावादी कार्य करत असताना आपले प्राण गमावलेल्या हजारो कार्यकर्त्यांना श्रद्धांजली वाहण्याचा हा दिवस आहे .
