सोलापूर, दि. ११– जिल्हा परिषदेच्या माध्यमिक शिक्षणाधिकारीपदाचा पदभार उपशिक्षणाधिकारी तृप्ती अंधारे पांच्याकडे देण्यात आला आहे. सहा महिन्यांपूर्वी माध्यमिक शिक्षण विभागाचे शिक्षणाधिकारी आस्करराव बाबर यांची बदली झाली. तेव्हापासून प्रभारींवरच येथील कारभार सुरू आहे.
सुरुवातीला या पदाचा पदभार उपशिक्षणाधिकारी सुलभा वठारे यांना देण्यात आला. मात्र, टप्पा अनुदान प्रकरणात वठारे वादग्रस्त ठरल्या. त्यांचा पदभार काढून महिला व बालकल्याण विभागाचे अधिकारी जावेद शेख यांच्याकडे देण्यात आला होता. मात्र, १५ दिवसांपूर्वी त्यांची बदली लातूरला झाल्याने त्यांचा पदभार आता अंधारे यांच्याकडे देण्यात आला आहे. सीईओ दिलीप स्वामी यांनी काढलेल्या आदेशानंतर अंधारे यांनी पदभार घेतला.
