येस न्युज मराठी नेटवर्क : सोलापूरच्या महापौर श्रीकांचना यन्नम तसेच अन्य पदाधिकारी आणि 108 नगरसेवकांची राजवट लवकरच संपणार आहे. मुदतीत निवडणुका होणार नसल्यामुळे सोलापूर सह राज्यातील दहा महापालिकांवर प्रशासक लागू करण्याचा निर्णय काल झालेल्या मंत्रिमंडळ बैठकीत घेण्यात आला यासाठी कायद्यामध्ये दुरुस्ती देखील करण्यात आली. राज्यातील मुंबई, नागपूर, ठाणे, पुणे, पिंपरी-चिंचवड, उल्हासनगर, नाशिक, सोलापूर, अकोला ,अमरावती या दहा महापालिकांच्या महापौर तसेच नगरसेवकांची मुदत येत्या सात मार्च रोजी संपत आहे. ओबीसी आरक्षण तसेच कोरोना महामारी या कारणामुळे ठरलेल्या वेळेत निवडणुका होणार नसल्यामुळे त्या-त्या महापालिकांवर प्रशासक नियुक्त करावे अशी सूचना राज्य निवडणूक आयोगाने राज्य शासनाला केली आहे. त्यामुळे विद्यमान नगरसेवक महापौर यांचा कालावधी येत्या पंचवीस दिवसात संपणार असून त्यानंतर महापालिकेचा संपूर्ण कारभार प्रशासकाच्या हाती येणार आहे मेअखेरीस महापालिका निवडणुका होतील अशी आशा आहे आणि सध्या प्रभागरचना जाहीर झाल्यामुळे प्रत्येक नगरसेवकांनी आपापल्या प्रभागांमध्ये विजयी होण्यासाठी खटाटोप सुरू केला आहे
