पंढरपूरः राज्यात कोरोना संसर्ग नियंत्रणात आणण्यासाठी मिनी लॉकडाऊनची घोषणा करण्यात आली आहे. राष्ट्रवादी काँग्रेसचे नेते जयंत पाटील यांचे
कोरोनासंदर्भातलं एक वक्तव्य गाजते आहे. पाटील यांनी आता या वक्तव्यावर स्पष्टीकरण दिले आहे.
पंढरपूर पोटनिवडणुकीच्या प्रचारादरम्यान जयंत पाटील यांनी ‘तुमचे सर्वांचे चेहरे पाहून जगात करोना नाही असे मला वाटते आहे , म्हणून मी ही मास्क काढून बोलतो,’ असे वक्तव्य केले होते. पाटील यांच्या वक्तव्यानंतर आश्चर्य व्यक्त करण्यात येत होते . आता मात्र, पाटील यांनी माझ्या वक्तव्याचा विपर्यास करण्यात आल्याचे स्पष्टीकरण दिले आहे. तसंच, व्यासपीठावर विनामास्क नेते बसले होते म्हणून उपहासाने बोललो, असे जयंत पाटील यांनी म्हटले आहे.
दरम्यान, पंढरपूर विधानसभा पोटनिवडणुकीत राष्ट्रवादीचे उमेदवार भगीरथ भालके यांच्या प्रचारासाठी राष्ट्रवादी काँग्रेसने जोरदार तयारी केली आहे. भाजपचे नेते कल्याणराव काळे हे राष्ट्रवादी काँग्रेस पक्षात प्रवेश करणार असल्याची जोरदार चर्चा आहे.
