कोरोनाविरुद्धच्या युद्धात मास्क हीच आपली ढाल : मुख्यमंत्री
येस न्युज मराठी नेटवर्क :किल्ले शिवनेरीवर मुख्यमंत्री उद्धव ठाकरे व उपमुख्यमंत्री अजित पवार यांच्या उपस्थितीत शिवजयंती सोहळा अत्यंत उत्साहात, पण साधेपणाने साजरा करण्यात आला. ‘शिवरायांपुढे नतमस्तक व्हायला शिवजयंतीच हवी असे नाही. त्यांचे स्थान आपल्या मनात, हृदयात आहे. कुठल्याही कामासाठी निघताना नकळत त्यांचे स्मरण होते . कारण ते आपल्या धमन्यांमध्ये आणि रक्तामध्ये आहेत, असे ते यावेळी म्हणाले. सोहळ्याला उपस्थित असलेल्या निवडक शिवप्रेमींना संबोधित करताना मुख्यमंत्री ठाकरे यांनी जोरदार टोलेबाजी केली.राष्ट्रवादी काँग्रेसचे आमदार अतुल बेनके यांनी छत्रपती शिवाजी महाराजांविषयी बोलताना त्यांच्या भाषाज्ञानाचा उल्लेख केला होता. अजितदादांना डोळ्यांची भाषा ओळखता येते असेही बेनके म्हणाले होते. तोच धागा पकडून उद्धव ठाकरे यांनी फटकेबाजी केली. छत्रपती शिवाजी महाराजांना अनेक भाषा अवगत होत्या. त्यात ‘इंगित विद्याशास्त्र’ ही एक भाषा होती. या भाषेमुळे एखाद्या व्यक्तीच्या मनात काय चाललंय हे ओळखता येते. आता ती भाषा मी शिकणार आहे. अजितदादांच्या मनात काय चालले आहे हे ओळखता आले पाहिजे. त्यासाठी मी ही भाषा शिकणार आहे. शिवरायांच्या काळातील युद्ध आता नाही. त्यावेळच्या ढाल, तलवारी नाहीत. मात्र, आता कोरोनाविरुद्धचे युद्ध सुरू आहे. त्यापासून स्वत:चा बचाव करायचा आहे. वार करायचा तेव्हा करूच, पण वार अडवण्यासाठी ढाल लागते. कोरोनाविरुद्धच्या युद्धात मास्क हीच आपली ढाल आहे, असे सांगून त्यांनी मास्कचे महत्त्व अधोरेखित केले. करोनाशी लढण्याची ती जिगर आणि प्रेरणा शिवरायांकडून आम्हाला मिळते आहे. आपल्या सगळ्यांना जोडणारे शिवराय आहेत. संपूर्ण जगात शिवरायांचे तेज पसरवणार,असे मुख्यमंत्री यावेळी म्हणाले.
