सोलापूर : कोरोनाचा प्रादुर्भाव वाढू नये यासाठी पालकमंत्री दत्तात्रय भरणे यांनी २५ फेब्रुवारीपासून ७ मार्चपर्यंत रात्रीची संचारबंदी जाहीर केली आहे. रात्री ११ ते पहाटे ५ वाजेपर्यंत अत्यावश्यक सेवा यातून वगळण्यात आल्या आहेत. दहावी-बारावी वगळता शाळा, महाविद्यालये पूर्णपणे बंद राहणार आहेत. सोलापूरकरांना लॉकडाऊन नको असेल गर्दीच्या ठिकाणी जाणे टाळा, मास्क आणि सॅनिटायझरचा वापर करावा असे आवाहन पालकमंत्र्यांनी केले आहे.
सोलापुरातील नियोजन भवनात पालमंत्र्यांनी बुधवारी दुपारी बैठक घेतली. यावेळी महापौर, श्रीकांचना यन्नम, जिल्हा परिषद अध्यक्ष अनिरुद्ध कांबळे, आ.राजा राऊत, बबनराव शिंदे, आ.प्रणिती शिंदे, महापालिका आयुक्त पी.शिवशंकर, अप्पर जिल्हाधिकारी संजीव जाधव, पोलीस आयुक्त अंकुश शिंदे, अप्पर पोलीस अधीक्षक अतुल झेंडे यांच्यासह महापालिकेचे पदाधिकार, नगरसेवक, अधिकारी उपस्थित होते. त्यानंतर बैठकीचा निर्णय पालकमंत्र्यांनी पत्रकारांना सांगितला. कर्नाटक राज्याप्रमाणे आता विविध राज्यातून येणाऱ्या नागरिकांची देखील कोरोना चाचणीची कागदपत्रे तपासली जाणार आहेत. गर्दी होऊ नये याबाबत महापालिका प्रशासनाने लक्ष द्यावे, कोरोना चाचण्या वाढवाव्यात, सर्व दवाखान्यांमध्ये तपासणी करावे असे आदेशही पालकमंत्र्यांनी यावेळी दिले.
