सोलापूर – येथील भैरूरतन दमाणी अंध शाळेची माजी विद्यार्थीनी तसेच राष्ट्रीय दृष्टीहीन संघाची सदस्या कु. गंगा संभाजी कदम हिची भारतीय अंध महिलांच्या क्रिकेट संघात निवड झालेली आहे. सदर निवडीसाठी क्रिकेट असोशियेशन फॉर दि ब्लाईंड महाराष्ट्र व भारतीय क्रिकेट असोशियेशन फॉर दि ब्लाईंड इंडिया यांचेवतीने पहिल्यांदाच दिनांक 25 ते 31 मार्च 2023 दरम्यान भोपाळ येथे झालेल्या निवड शिबीरात सबंध भारतातुन एकूण 40 महिला खेळाडुंमध्ये अंतिम 17 खेळाडुंच्या यादीत कु. गंगा कदम हिचा समावेश करणेत आला आहे.
दिनांक 23/04/2023 ते 30/04/2023 दरम्यान नेपाळ येथील काठमांडु शहरात भारत विरुध्द नेपाळ यांचेमध्ये एकूण 5 टी- 20 सामने होणार आहेत त्यात गंगा कदम हिचा समावेश आहे. त्यानंतर मे 2023 मध्ये होणा-या इंग्लड भारत यांच्यातील 3 एकदिवसीय व 5 टी-20 सामने खेळण्यासाठी ती इंग्लंडला जाणार आहे. तिच्या यशामध्ये प्रशिक्षक राजु शेळके, दमाणी शाळेचे मुख्याध्यापक प्रकाश दर्शणाळे, जामश्री क्रिकेट क्बलचे प्रशिक्षक अनिल साम्रानी व सीएबीएमचे महासचिव माधव गोरे यांचे तिला बहुमुल्य मार्गदर्शन लाभले. या निवडीमुळे सोलापुरातील क्रिकेटप्रेमींतून अभिनंदनाचा वर्षाव होत आहे.
