सेवा पंधरवड्यानिमित्त समाज कल्याण विभागाचा उपक्रम
सोलापूर : सेवा पंधरवड्यानिमित्त 1 ऑक्टोबर 2022 रोजी ज्येष्ठ नागरिक दिनानिमित्त ज्येष्ठ नागरिकांसाठी ग्रामीण आणि शहरातील सर्व शासकीय रूग्णालयामध्ये आरोग्य तपासणी शिबिराचे आयोजन आणि मोडनिंब येथे ज्येष्ठ नागरिक संवाद कार्यक्रमाचे आयोजन केले आहे. याबाबतची माहिती समाज कल्याण सहायक आयुक्त कार्यालयाचे समाज कल्याण अधिकारी राजेंद्र बुजाडे यांनी परिपत्रकाद्वारे दिली.
जिल्ह्यातील ज्येष्ठ नागरिकांची आरोग्य तपासणी करण्यासाठी शहरी भागामध्ये महानगरपालिका क्षेत्रामध्ये आरोग्य अधिकारी सोलापूर महानगरपालिका यांच्यामार्फत सर्व नागरी आरोग्य केंद्र, ग्रामीण क्षेत्रामध्ये जिल्हा आरोग्य अधिकारी व जिल्हा शल्यचिकित्सक यांच्यामार्फत सर्व उपजिल्हा रुग्णालये, ग्रामीण रुग्णालये, प्राथमिक आरोग्य केंद्रामध्ये ज्येष्ठ नागरिकांच्या आरोग्य तपासणी शिबिराचे आयोजन करण्यात आले आहे.
शिवाय मोडनिंब येथे सकाळी 11 वाजता जेष्ठ नागरिक कार्यालय, गणपती मंदिराजवळ, दत्तनगर येथे जेष्ठ नागरिक संवाद कार्यक्रमाचे आयोजन करण्यात आलेले आहे. कार्यक्रमामध्ये जेष्ठ नागरिकांच्या समस्या व त्यांचे निराकरणाबाबत मार्गदर्शन/व्याख्यान, केंद्रीय जेष्ठ नागरिक कायदा 2007, राज्याचे सर्वसमावेशक जेष्ठ नागरिक धोरण 2013, त्यांच्यासाठी असलेल्या शासकीय योजनाबाबत मार्गदर्शन करण्यात येणार आहे.
जास्तीत जास्त ज्येष्ठ नागरिकांनी आरोग्य तपासणी शिबीर, संवाद कार्यक्रमाचा लाभ घेण्याचे आवाहन सहायक आयुक्त, समाज कल्याण कार्यालयाने केले आहे.
