अहिल्यानगरः विधान परिषदेचे माजी आमदार अरुण बलभीमराव जगताप यांचे आज, शुक्रवारी पहाटे रुग्णालयात उपचार सुरू असताना निधन झाले. ते ६७ वर्षांचे होते. त्यांच्या पार्थिवावर आज सायंकाळी अहिल्यानगर शहरातील अमरधाममध्ये अंत्यसंस्कार केले जाणार आहेत. अरुण जगताप हे काका नावाने ओळखले जात. त्यांच्या निधनाने शहरावर शोककळा पसरली.
अहिल्यानगर शहराचे विद्यमान आमदार संग्राम जगताप यांचे ते वडील होत. त्यांचे दुसरे चिरंजीव सचिन जगताप हे जिल्हा परिषदेचे माजी सदस्य तर स्नुषा शितल संग्राम जगताप ह्या माजी नगरसेविका तसेच पत्नी व एक विवाहित कन्या असा परिवार त्यांच्यामागे आहे. भाजप आमदार तथा जिल्हा बँकेचे अध्यक्ष शिवाजी कर्डिले व अहिल्यानगर तालुका कृषी उत्पन्न बाजार समितीचे माजी सभापती भानुदास कोतकर यांचे ते व्याही होत. अरुण जगताप गेल्या काही दिवसांपासून आजारी होते. त्यांच्यावर पुण्यातील खासगी रुग्णालयात महिनाभरापासून उपचार सुरू होते. आज पहाटे त्यांची प्राणज्योत मालवली. दुपारी त्यांचे पार्थिव सारसनगर भागातील निवासस्थानी अंत्यदर्शनासाठी ठेवले जाईल, नंतर सायंकाळी अंत्यसंस्कार करण्यात येतील.
