येस न्युज मराठी नेटवर्क : कृपाशंकर सिंह यांचा प्रवेश हा या पक्षातून त्या पक्षात झालेला नाही, तर हा प्रवेश एका विचारधारेतून दुसऱ्या विचारधारेत झाला असल्याचं सांगत देवेंद्र फडणवीस यांनी आज काँग्रेसमधून भाजपात प्रवेश करणाऱ्या कृपाशंकर सिंह यांचे स्वागत केले . कृपाशंकर सिंह यांचा पक्षप्रवेश आणि श्यामाप्रसाद मुखर्जी यांच्यावरील लेखांच्या संग्रहाचे प्रकाशन अशा संयुक्त कार्यक्रमात आपली मते व्यक्त केली.यावेळी बोलताना फडणवीस म्हणाले, ते जेव्हा काँग्रेसमध्ये होते, त्यावेळी त्यांनी प्रामाणिकपणे काम केले . पण ज्यावेळी त्यांना कळले की नरेंद्र मोदी काश्मीर प्रश्नावर अंतिम उपाय शोधत आहेत आणि काँग्रेस त्याला विरोध करत आहे. त्यावेळी त्यांनी मोदींना पत्र लिहून आपली भूमिका स्पष्ट केली. तसेच काँग्रेसने जर समर्थन केले नाही तर मी पक्ष सोडेन असा इशाराही दिला. त्यावेळी त्यांच्यातला राष्ट्रवाद जागा झाला होता. भाजपामध्ये सहभागी होण्यापूर्वी कृपाशंकर सिंह यांनी काश्मीरच्या मुद्द्यावर काम केले .
