कुर्डुवाडी : गंभीर स्वरूपाच्या गुन्ह्याच्या प्रकरणातील चार सराईत आरोपींनी माढा सबजेल मध्ये एकाला फिट आल्याचा बनाव करुन पोलिसालाच धक्काबुक्की करुन माढा सबजेलमधून पलायन केले. ही घटना सोमवारी दि.१९ रोजी सकाळी ८ वा.सुमारास माढा येथील सबजेल मध्ये घडली.
सिद्धेश्वर शिवाजी केचे रा.दारफळ ता.माढा, आकाश उर्फ अक्षय राॅकी भालेकर रा.डिडुळगाव जि.पुणे, तानाजी नागनाथ लोकरे रा.लऊळ ता.माढा, अकबर सिद्धाप्पा पवार रा.कुर्डू ता.माढा अशी सबजेल मधून पळून गेलेल्या आरोपींची नावे आहेत. माढा सबजेलमध्ये माढा, कुर्डुवाडी, टेंभुर्णी पोलिस ठाण्यांतर्गत गुन्ह्यातील आरोपी न्यायालयीन कोठडीमध्ये ठेवले जातात. यासबजेलमध्ये एकूण पाच सेल असून यात एकूण २३ आरोपी आहेत. पोलिस कोठडी मधील पुरुष आरोपी हे सेल एकमध्ये ठेवले आहेत. सेल एक मध्ये ठेवलेल्या ८ आरोपीपैकी अकबर सिद्धाप्पा पवार या आरोपीस वारंवार फिट येतात.सोमवार दि.१९ रोजी सकाळी ६ ते ८ अशी पो.ना.शहाजी सोपान डुकरे यांची पहारा ड्यूटी होती.त्यावेळी सेल क्रमांक एक मधील आरोपी अकबर सिद्धाप्पा पवार यास फिट आली म्हणून इतर आरोपी ओरडू लागले.त्यावेळी कर्तव्याचे असणारे डुकरे हे लागलीच सदर सेलचे कुलूप काढून सेल उघडत असताना वरील चारही आरोपी कर्तव्यावर असणाऱ्या पो.ना डुकरे यांना धक्काबुक्की करु लागले. त्यांना पुन्हा आत ढकलण्याच्या प्रयत्नात असणाऱ्या डुकरे यांना चौघा आरोपींनी एकदम धक्का देत खाली पाडले व चारही आरोपींनी सबजेलमधून धूम ठोकली.
