येस न्यूज नेटवर्क : थायलंडची राजधानी बँकॉकमध्ये शुक्रवारी 7.7 रिश्टर स्केल तीव्रतेचा शक्तीशाली भूकंप झाला. या शक्तीशाली भूकंपात अनेक स्कॅयरॅपर इमारती जमीनदोस्त झाल्या आहेत. बीबीसीच्या वृत्तानुसार, जर्मनीच्या GFZ भूगर्भशास्त्र केंद्राने सांगितले की, हा भूकंप दुपारी 10 किलोमीटर खोलीवर झाला. त्यामुळे जिवितहानी आणि वित्तहानी मोठ्या प्रमाणात होण्याची शक्यता आहे. सध्या तरी जीवित वा मालमत्तेच्या हानीबाबत तत्काळ माहिती मिळालेली नाही. GFZ भूगर्भशास्त्र केंद्रानुसार, भूकंपाचा केंद्रबिंदू शेजारच्या म्यानमारमध्ये होता. बँकॉकमध्ये बांधकाम सुरू असलेल्या इमारतीच्या कोसळण्यामुळे ४३ लोक ढिगाऱ्याखाली गाडले गेले आहेत.
या ५ देशांच्या वेगवेगळ्या भागात शेकडो लोक घाबरून घरे आणि कार्यालये सोडून पळून गेले. मोठ्या प्रमाणात झालेल्या विध्वंसामुळे थायलंडचे पंतप्रधान पिथोंगटार्न शिनावात्रा यांनी आणीबाणी जाहीर केली आहे.
कुठे घडले : यूएस जिओलॉजिकल सर्व्हे आणि जर्मन रिसर्च सेंटर फॉर जिओसायन्सेस (GFZ) नुसार, मध्य म्यानमारमध्ये ७.७ तीव्रतेचा शक्तिशाली भूकंप झाला. भूकंपाचा केंद्रबिंदू सागाईंग शहराच्या वायव्येस १६ किमी (१० मैल) अंतरावर १० किमी खोलीवर होता.
कुठे परिणाम झाला: म्यानमार, थायलंड, बांगलादेश, भारत आणि नैऋत्य चीनसह ५ देशांमध्ये याचा परिणाम दिसून आला. येथील अनेक भागात जोरदार भूकंपाचे धक्के जाणवले. पीटीआय वृत्तसंस्थेने दिलेल्या वृत्तानुसार, भारतातील कोलकाता, इंफाळ, मेघालय आणि ईस्ट कार्गो हिलमध्ये भूकंपाचे धक्के जाणवले. ढाका, चितगावसह बांगलादेशातील अनेक भागांना ७.३ रिश्टर स्केल तीव्रतेचे भूकंपाचे धक्के बसले. बारा मिनिटांनंतर, म्यानमारमध्ये ६.४ तीव्रतेचा आणखी एक भूकंपाचा धक्का बसला.
आतापर्यंतचे नुकसान: अद्याप ज्ञात नाही. थायलंड सरकार एक आपत्कालीन बैठक घेत आहे. बँकॉकमध्ये इमारतींचे नुकसान झाले आहे. म्यानमारची राजधानी नायपिदावमध्ये रस्ते खराब झाले आहेत.
