पुणे : “माझा स्वभाव शांत आहे, पण अनेकांना वाटत नाही. लहानपणी मी खोड्या करत नव्हतो पण खोड्यांचा साक्षीदार असायचो. मी सीझनल खेळ खेळायचो. बॅटिंग केली की मी फिल्डिंग करत नव्हतो तिथून पळून जात होतो”, अशा शालेय जीवनातील आठवणींना माजी मुख्यमंत्री विरोधी पक्षनेते देवेंद्र फडणवीस यांनी उजाळा दिला. तसेच मी पिंपरी चिंचवड येथील कार्यक्रमास ‘पुन्हा येईन’ असे सांगतच सभागृहात एकच हास्यकल्लोळ झाला.
पिंपरी चिंचवडमध्ये मोरया यूथ फेस्टिव्हलचे उदघाटन माजी मुख्यमंत्री देवेंद्र फडणवीसांच्या हस्ते झाले. यावेळी सिनेअभिनेते राहुल सोलापूरकर आणि भाजप नेते सचिन पटवर्धन यांनी त्यांची मुलाखत घेतली. विद्यार्थ्यांशी मुक्त संवाद साधण्यात त्यांना वेळ अपुरा पडला. तेंव्हा विद्यार्थ्यांच्या प्रश्नांना उत्तरं देण्यासाठी स्वतंत्र वेळ द्या अशी विनंती करण्यात आली. याला उत्तर देताना या कार्यक्रमासाठी “मी पुन्हा येईन” असं मिश्किल विधान करताच सभागृहात एकच हशा पिकला.
