येस न्युज मराठी नेटवर्क : केंद्रीय निवडणूक आयोगाने शिंदे गटाला काल ‘बाळासाहेबांची शिवसेना’ हे नाव दिल्यानंतर आज ढाल तलवार चिन्ह बहाल केलं आहे. शिंदे गटाने काल दिलेले पर्याय निवडणूक आयोगाने नाकारले होते. त्यानंतर पुन्हा चिन्हांचे पर्याय देण्यासंबंधीचे निर्देश आयोगानो शिंदे गटाला दिले होते. आयोगाच्या सूचनेनंतर शिंदे गटाने आज दुपारपर्यंत पर्याय पाठवले होते. त्यानुसार निवडणूक आयोगाने बाळासाहेबांची शिवसेना अर्थात शिंदे गटाला ढाल तलवार चिन्ह दिलं आहे.
केंद्रीय निवडणूक आयोगाने ठाकरे गटाला शिवसेना (उद्धव बाळासाहेब ठाकरे) असं नाव वापरण्यास परवानगी दिलेली आहे. तर शिंदे गटाला ‘बाळासाहेबांची शिवसेना’ असं नाव मिळालेलं आहे. दुसरीकडे आयोगाने ठाकरेंना मशाल चिन्ह दिलेलं आहे. तर शिंदेंकडे चिन्हासाठी आज सकाळी दहा वाजेपर्यंत तीन पर्याय मागितले होते. शिंदेंच्या पर्यायातून एक पर्याय निवडून निवडणूक आयोगाने सायंकाळी साडे पाच वाजताच्या दरम्यान बाळासाहेबांची शिवसेना गटाला ढाल तलवार चिन्ह प्रदान केलं.
शिंदे गटाला सूर्य चिन्ह का मिळालं नाही?
एकनाथ शिंदे गटानं सूर्य हे चिन्ह मागितलं होतं. मात्र ते झोराम राष्ट्रीय पक्ष आणि द्रमुकशी संबंधित असल्यानं ते देण्यात आलं नाही. तर, ढाल तलवार हे चिन्ह पीपल्स डेमोक्रॅटिक मूव्हमेंटकडे होतं. मात्र ते पक्ष २००४ ला यादीतून वगळ्यात आल्यानं शिंदे गटाच्या ‘बाळासाहेबांची शिवसेने’ला दोन तलवार आणि एक ढाल हे चिन्ह मिळालं.
ढाल तलवार मिळाल्यावर शिंदे गटाची प्रतिक्रिया
ढालीनं जनतेचं रक्षण करायचं आणि दुश्मन अंगावर आलं तर तलवार उगारायची. शिंदे गटाला मिळालेलं ढाल तलवार चिन्ह एकदम परफेक्ट असल्याची प्रतिक्रिया आमदार भरत गोगावलेंनी एका वृत्तवाहिनीशी बोलताना दिली. शिंदे गट अंधेरी पूर्व विधानसभा मतदारसंघात उमेदवार देणार का, ही निवडणूक लढवणार का, असा प्रश्न विचारला असता, बघू, आधी चिन्ह मिळणं गरजेचं होतं,असं उत्तर गोगावलेंनी दिलं. आम्हाला आग लावणारं चिन्ह नको होतं, असं म्हणत त्यांनी ठाकरे गटाच्या मशाल चिन्हावरून टोला लगावला.
